لما جت الممرضة الصبح تديني لبس العمليات دق قلبي بسرعة .. ماكنتش عارفة ده توتر ولا خوف ولا فرحة
كان الترولي واقف على باب الأوضة مستنيني والممرضة بتستعجلني ... طلبت منهم يخرجوا عشان البس ... وفضل احمد عشان يساعدني
كانت بتخبط على الباب كل ثانية .. مادنتيش فرصة اترمي في حضنه واسيب دموعي المحبوسة تنزل واقوله اني خايفة ... اوعي تسيبني لوحدي
اكتفيت اني ابص في عنيه واقولهاله بعيني
وفي عنيه شفت نظرة قلق وحب جميلة ... ماعرفتش اترمي في حضنه ... بس عنيه حضنتني وطمنتني
................................
على باب اوضة العمليات وقفوه عشان يتعقم الاول وساب ايدي وبعد عني ... كانت الدموع بتجري من عيني مش قادرة اوقفها وانا بقول للدكاترة والممرضات كلمة واحدة بس "هاتولي احمد ... انا عايزة احمد"
ماكنتش حاسة بألم لأني هاولد قيصري ... لكن بصيت حواليا لقيت دكاترة وممرضات بيعملوا العملية دي كل يوم ... كنت بالنسبة لهم مجرد حالة من اللي بتعدي عليهم باستمرار ... وفي الدقايق اللي احمد سابني فيها عشان يتعقم حسيت بغربة وخوف عمري ما حسيتهم في حياتي
الأوضة برد اوي ... عايزة احمد ... عايزاه ياخدني في حضنه ويدفيني
جه دكتور التخدير وخدرني وكان اخر حاجة بقولها "عايزة احمد"
.................................................
فقت بعد شوية على صوت حبيبي وهو بيناديني ... فتحت عيني .. كنت لسة جوة اوضة العمليات ... وكان البيبي جنبي بيعيط ... صوته كان اجمل حاجة سمعتها في حياتي .... بصيتله وانا مش مصدقة نفسي ... تعبانة ومرهقة ... بس فرحانة
ماكنتش اتفقت مع احمد على اسم ... لقيتني بقول لاحمد بصوت ضعيف "سميه احمد ... عشان خاطري"
ماكنتش قادرة اتكلم كتير ... احمد ماكنش موافق على الأسم لكن حالتي وانا بطلب منه الطلب ده خلته يوافق
همس في ودني "هاتحبيه أكتر مني " ... رديت وقلت " هاحبه عشان هو منك "
.........................................
ودلوقتي بقى عندنا أحمد الصغير :) نسخة من احمد الكبير
يارب يشبه ابوه في كل حاجة مش بس الأسم والشكل
..............................
........................................
الشهر ده احمد الصغير كمل 3 شهور ... وانا واحمد حبيبي كملنا سنة متجوزين
بيقولوا السنة الأولى من الجواز بتكون اصعب واوحش سنة .... لو دي اوحش سنة .... أمال احلى سنة هايكون شكلها ايه
السنة اللي فاتت كانت أحلى سنة في عمري ... بدأتها أنا واحمد وختمتها أنا واحمد واحمد :)
7 comments:
بسم الله ماشاء الله
ربنا يخلهملك هما الاتنين
وتفضلوا ف السعاده دى دايما
اولا الف الف حمدا لله على سلامتك
وكده عرفت ايه سبب بعدك عن المدونة وده احلى احلى احلى سبب
سيبيبنى بقى ازغرط للنونو الجميل ده بعد ماشاء الله ربنا يحميه ويبارك فيه ويجعله قرة عين لكم يارب
لولولولولولولوللولى
احلفلك بالله العلى العظيم انك بتحكى نفس سيناريو ولادة بنتى مريم بالظبط وساعتها الطبيب اتعاطف معايا انا واحمد زوجى وعقموه علشان يدخل معايا غرفة العمليات ياااااااااه لحظات لا تنسى ابدا ابدا
ربنا يديم عليكم الحب والسعادة يارب وكده بقى يا ستى يبقى من حق بابا احمد يسمى البنوتة اللى هتيجى بعد كده ان شاء الله داليا ههههههههههه وهتبقى لخبطة جامدة هههههههههههه
دعواتى ليكى تعيشى فى هنا وسعادة على طول ويفضل بيتك واحة امان ليكى ولزوجك واولادك باذن الله
يا اخواتى على طعامته الله يحفظه ويبارك فيه بوسه كبيره جدا لكتكوتى الصغنتت ده
فى حفظ الله يا اختى
لا تعليق
فكلامك اكبر من اي كلام
دمتي داليا واحمد
msA ya Dalia, bgad rabena y7'alilek Ahmed w Ahmed w y7fazhomlek, bgad everytime I read ur blog ba7es en lesa fi 7obb fl donia w lesa fi naas kwayesin. Rabena y7'aliko l ba3d :)
اولا حمد الله على السلامه
ثانيا مبروك
ثالثا ربنا يخليكوا لبعض
ويفرحك باحمد الصغير
حزينه
بس فرحانه بيكى
ميرسي ليكوا كلكوا يا جماعة على دعواتكم الجميلة :)
first.. alf mabroooooooooooook 3ala wosool a7med el so3'ayar belsalama...
da 7'abar gameel gdn.. :) rabena yebarekloko feeh ya rab we yekoon zorya sal7a ISA.
sanyan we dah el aham.. 7amdela 3ala salmtek enty.. 7amdela 3ala salemtek lel welada.. we 7amdela 3ala salmtek ba3d tool 3'yab.. :)
rabena yeg3al ayamek we ayamko koloko sa3ada ISA... :)
Post a Comment