Monday, November 30, 2009

زي النهاردة

زي النهاردة من 3 سنين كانت قراية فاتحة أختي على جوزها
رجعت من الشغل بدري عشان أساعدهم
عديت على المحل جبت الجاتوة والساليزون اللي ماما حجزتهم ورجعت البيت أشوف نهال هاتلبس أيه وتتمكيج ازاي
وبالليل جه إسلام وعيلته عشان يخطبوا أختي
ماكنتش لاقية كاميرا عشان أصورها .. طلعت برة عشان اخد موبيل أسلام نتصور بيه...
أعرف إسلام من زمان أوي .. هو صاحب أخويا من أكتر من 10 سنين بس أتكسفت أوي وانا باخد منه الموبيل عشان كل أهله كانوا موجودين وانا أول مرة أشوفهم ... بسمع عنهم كتير بس أول مرة يدخلوا بيتنا
باباه ومامته وأخوه وأخته في صالة بيتنا مع عمي وأخويا بيتكلموا في مواضيع غريبة وماحدش بيتكلم في الموضوع الأساسي
والستات قاعدين في الليفنج مستنيين أي حد يفتح الموضوع ... وأنا ونهال كل شوية نبص لبعض ونضحك
دخلت نهال تجيب العصير من المطبخ وتقدمه وقفتها على باب المطبخ وصورتها صورة بنضحك عليها كل ما نشوفها
أنا بقى قدمت الجاتوة ...لفيت على كل القاعدين ولما جه دور أخو إسلام وقعت الشوكة على الأرض وأنا بقدمله طبق الجاتوة ... ضحكنا ودخلت أجيبله غيرها
رجعت مكاني في الليفنج مع باقي الستات مستنيينهم يقروا الفاتحة ... كنا كلنا باصين ناحيتهم ... مرتين لمحت أخو العريس بيبص ناحيتي....
أخيراً قروا الفاتحة وزغردنا وقمنا كلنا نبوس نهال ونبارك لإسلام
.
.
.
.
زي النهاردة من 3 سنين خلصت حياتي زي ما اتعودت عليها وابتدت حياة جديدة عمري ما كنت اتصور أعيشها
عشان بعد أسبوعين من اليوم ده أتقدملي أخو إسلام ... إتقدملي حبيبي وأبو أبني وأجمل راجل عايش على وش الدنيا
أتقدملي أحمد
زي النهاردة كان عيد ميلادي الثاني ... عشان زي النهاردة كان اول يوم أشوف فيه أحمد ويشوفني
......
كمان أسبوعين هاكتب بوست تاني فيه اللي حصل يوم ماتقدملي أحمد :)

6 comments:

صاحب المضيفة said...

ربنا يديم سعادتكما ويرزقكما الذرية الطيبة والحياة الهانئة يارب

حزينه said...

ربنا يكرمك ويزود سعادتك
بسم الله ماشاء الله
مستنين البوست

confused said...

Blimey, three years!! and we actually attended that whole thing from the beginning.

By the way I was just remembering your 7enna day, and thinking that was probably one of (if not the) nicest parties I've ever been to, and to think we actually went there before your :D :D begad good old days, those were.

بنت الغربة said...

انا اول مرة ادخل المدونه
بس شكلى هازورها كتيير
ربنا يباركلك فى جوزك وابنك يارب
على فكرة احنا زى بعض فى حاجتين مهمين قوى
اولهم الاسم
وتانيهم.....هاقولك بعدين
تحياتى

رحيق الحب said...

ياااااااااه بحس فى كلامك بكميه صفاء ونقاء مش طبيعى تلقائيه شديدة جدا على الرغم انى معرفكيش بس بعرفك كل مرة اكتر من هنا من خلال صفحتك بجد بجد ربنا يسعدك ويزيدك رضا وايمان ويسعد حياتك كلها ويخليليك احمد الصغير والكبير وتفرحى بالصغير ان شاء الله

Anonymous said...

ما شاء الله عليكم

ربنا يديم الحب و الموده و السعاده عليكو

بفرح اوي لما ألاقي عيله رومانسيه كده

ما شاء الله نمسك الخشب

يا ريت تشرفوني في مدونتي المتواضعه
http://ra7alaat.blogspot.com/

شكرا لوقتكم