لشهور فضلت اسأل نفسي السؤال ده
أفعد في البيت ولا اكمل في الشغل
وبيتهيألي في ستات كتير بتسأل نفسها السؤال ده
وإجابة السؤال ده فعلاً صعبة ... أنا فكرت فيه لشهور طويلة واخدت رأي من بنات كتير من أصحابي
بس الحقيقة ماحدش فيهم أداني رأي مفيد (مع أحترامي ليكوا كلكوا يا بنات :))
عشان مافيش ولا واحدة فيهم تعرف كل معطيات المشكلة ... مافيش ولا واحدة فيهم قدرت تديني رأي يريحني
طبعاً انا بسأل البنات لأن رأيهم بالنسبة لي هايكون موضوعي اكتر من رأي الرجالة اللي أحنا كلنا عارفين رأيهم هايكون أيه :)
أكتر رأي بجد ساعدني كان رأي احمد جوزي لأنه الوحيد اللي معاه كتالوج مخي
لكن رغم رأيه الموضوعي جداً ... برضه فضل القرار صعب
وأخيراً وبعد شهوووووووووووووور من التفكير اخدت القرار
أنا هاقعد في البيت
أه والله بعد 7 سنين خدمة في مكاتب القطاع الخاص قررت أقعد في البيت
المهم نطلع من الرغي ده بأية
أنا بكتب البوست ده عشان أساعد أي واحده في مكاني ومش عارفة تاخد القرار الصح
القرار ممكن يبان سهل لأي حد لكن لواحدة قضت كل السنين دي من عمرها بتشتغل .. عرفت يعني ايه تكون مستقلة وقادرة تصرف على نفسها... عرفت أزاي تبني وتكبر وتعلم نفسها ... عرفت ازاي تكسب احترام اللي حواليها وتنجح في شغلها
القرار بالنسبة لست زي دي بيكون صعب اووي
لأنه بيكون قرار بقلب نظام حياتها اللي عرفته واتعودت عليه لسنين وسنين
قرار بتغيير شكل مستقبلها اللي كان في دماغها
هاتسبدل كل حاجة عرفتها واتعودت عليها بحاجة مجهولة تماماً
والمجهول دايماً مخيف
مش بقول ان القرار الصح انها تقعد في البيت ... القرارده كان صح بالنسبة لي بس مش معنى كدة انه صح لكل الناس
عشان تعرفي تقعدي ولا لأ في البيت لازم تجاوبي عن الأسئلة اللي جاية دي بكل صراحة وموضوعيه... لازم تكوني صريحة مع نفسك لأبعد حد عشان ماتندميش على قرارك
الأسئلة دي أجابتها نعم أو لا و مترتبة بطريقة معينة لو جاوبتي على أي سؤال فيهم بــ لأ يبقى لازم تفكري مليون مرة قبل ما تسيبي الشغل لأنك ممكن تندمي لو سبتيه
لو جاوبتي على كل الأسئلة بــ نعم يبقى انتي فعلاً محتاجة تراجعي نفسك في موضوع الشغل ده
السؤال الأول: هل تثقين بتحمل زوجك لمسئولية البيت كاملة وتشعرين بالراحة والأمان تجاه هذا الأمر؟
السؤال الثاني: هل يمكنك الأستغناء عن العائد المادي من عملك؟
السؤال الثالث: هل تكرهين وظيفتك؟
السؤال الرابع: هل تشعرين بالضغط العصبي يومياً؟
السؤال الخامس: هل يمكنك أن تكتبي قائمة من خمس اشياء من المفترض ان تكون من اولوياتك ولكن لا تجدي الوقت لعملها ؟
ملحوظة: المقصود بالأولويات هنا ليس أعمال البيت ولكن أعمال مثل رعاية أحد الوالدين في مرض أو قضاء وقت كافي مع أولادك
السؤال السادس: هل يمكنك أن تكتبي قائمة من خمس أشياء تحبينها ولكن لا تجدين الوقت لعملها؟
مثال: هوايات لا وقت لممارستها..الخروج مع أصدقاءك ...ألخ
السؤال السابع: هل يمكنك ان تكتبي قائمة بخمس أشياء لابد من عملها في المنزل ولا يوجد وقت لها؟
السؤال الثامن: في نهاية اليوم ...هل تشعرين بعدم الرضا عن الطريقة التي يسير بها يومك؟
جاوبي على الاسئلة دي والبوست اللي جاي هاكتب عن أجاباتي للأسئلة دي وازاي ساعدتني آخد قراري
8 comments:
سلام عليكم داليا
انا رايي ما تعقديش في البيت
بصي انا قعدت في البيت خمس شهور بس مقدرتس استمر عشان انا اتعودت اني اشتغل ويبقى ليا كيان تاني في مكان تاني يعني انا بحب جوزي وبنتي وكله تمام بس القعدة بتخلي اهتماماتك محصورة وبعدين حتشعري بالملل هو بالاول تبفى الفعدة لزيزة بعدين لا وكمان في جانب مهم الا هو الجانب المالي تفرق كتير يعني حتى لو جوزك وبيتك مش محتاجين فلوسك مئة بالمية يعني لما تكوني انتي متعودة تجيبي الي انتي عوازاه غير اوي لما تاخدي من مصروف البيت والله عظيم بتفرق خاصة الي متعودة على الصرف
رنا امين
وعليكم السلام يا رنا :)
أنا قعدت في البيت من 3 شهور ولحد دلوقتي لسة مازهقتش ... مش عارفة كمان شوية ايه اللي هايحصل:)
بالنسبة لأهتماماتي ماحستش انها محصورة خالص ... تابعي المدونة وانا هاقولك ازاي
بالنسبة للصرف بأه .. أنا فعلاً مش حاسة بالمشكلة دي خالص .. دي حاجة بتفرق بين حد والتاني ... يعني انا مثلاً مش من النوعية اللي بتحب الشوبنج واللبس والأكسسوارات خالص ... يمكن عشان كدة ماعنديش مشكلة ... يعني انا بحب اصرف على الكتب او اروح الجيم عشان كدة مش حاسة بمشكلة .. ده غير ان احمد فعلاً مش مخليني محتاجة حاجة
القعدة في البيت مش مناسبة لكل الناس .. المهم لما اليوم يخلص تحسي انك فعلاً سعيدة باليوم اللي عدى من عمرك :)
ميرسي يا جميلة على التعليق وربنا يخليلك بنوتك :)
داليا:كلامك بيعجبنى جدااااا وبحس فيه ببساطه وتلقائيه شديدة بحس انك من افراد اسرتى او حد قريب منى
المهم انا بحييك على قرارك بس مع احترامى ليكى فى حاجة قرار زى ده محدش هيقدر يفيدك فيه غير نفسك انتى بس لأن الموضوع ده يختلف منش خص لاخر ممكن تكون القعدة فى البيت شئ ممل جدا حتى لو هيا مش محتاجة ماديا لسبب لأنها مش بتعرف توظف وقتها صح معندهاش هوايات بتمارسها حاجاتها محدودة فى حاجات معينه فالطبيعى لازم هتزهق وكمان يا ترى جوزها ايه نظام شغله فيه رجاله كتير بتقعد وقت طويل فى عملها واحنا عارفين الموضوع ده وغصب عنه ظروف العمل تحتم ذلك ممكن يخرج من الصبح لحد الساعه 10 و11 بليل وساعات اكتر يبقى صعب انها هتقعد تكلم نفسها طول الوقت وكمان يختلف الموضوع اذا كان هتقدر توظف وقتها ما بين بيتها وجوزها وطفلها لو ربنا رزقها بطفل وكمان شغلها يعنى هيكون ايه استبداى يعنى مش مهم يغور هوا وفلوسة ولا لأ حاجة صعب انى اعوضها
انا بتكلم وياكى كدة وانا موظفة اشتغلت فى قطاعات مختلفه ما بين الحكومه والقطاع الخاص وحاليا اعمل فى قطاع اعمال تابع للحكومه ومتزوجه عشان كدة حاسه باللى بتفكرى فيه لأنى كنت فى الحيرة دية كتيييييييييير جدا
بس عموما احييكى على اتخاذ قرارك مدام فيه الرضا بالنسبه الى نفسك وزوجك واسرتك
رحيق الحب
ميرسي على مجاملتك الرقيقة :)
طبعاً انتي معاكي حق ان قرار زي ده ماينفعشي حد يقول لحد يعمل فيه ايه... لكن انا بحكي تجربتي يمكن تساعد حد مش اكتر
كل اللي يعرفني ماكانشي يتصور اني ممكن اقعد في البيت ابداً ولا حتى انا بس الفكرة اللي انا اقصدها ان لو كان اللي بيوديكي الشغل كل يوم هو انك مش بتعرفي تستغلي وقتك صح بس أو ان جوزك بييجي متأخر أو أن ماعندكيش هوايات فاسمحيلي اقولك انك بتضيعي على نفسك حاجات جميلة اوي في الحياة
وطبعاً الاختلاف في الرأي لا يفسد للود قضية :)
ميرسي يجد مرة تانية على تعليقك ... نورتيني :)
اكيد الاختلاف فى الرأى لا يفسد للود قضيه وانا معاكى على فكرة مش ضدك بالعكس احييك على قرارك ده
وانا معاكى لو انا بروح الشغل بس عشان الاسباب اللى انتى قولتلى عليها شئ غلط مش صح بس الناس وصوابعك مش زى بعضها يا داليا فيه ناس اعرفهم فعلا بجد صعب جدا قعدتهم فى البيت لأنهم ممكن يكتئبوا ويحصل بلاوى وبعيد عننا فيه ناس معندهاش اولاد وفيه ناس فعلا بجد متعرفش مهما قلتى او عملتى انهم يتعلموا او ينموا هوايه عندهم بدعوى ان خلاص الوقت والميعاد فات فا بالنسبه ليها الشغل احسن طريقه لكن بعيا عن كل ده وجهه نظر الشغل تختلف من شخص للتانى
فيه حد عايز يكون ناجح فى شغله وفى بيته بدليل نماذج كتير يا داليا حققت ده بمساعدة الزوج طبعا والاسرة وكمان بينمى حاجات كتير جدا فى شخصية الست عموما
وبخلاف كل ده الاساس نفسه هوا الزوج والبيت لو كان فيه اى حاجة هتأثر على العش الهادى ده يبقى بلاش منه احسن
رحيق الحب
كلامك تمام .. وانا على فكرة مش بدعو الست انها تقعد في البيت خالص... انا بس بقول ان في حالات معينة قعدة البيت ممكن تكون تجربة اكثر ثراءاً و مرضية بشكل كبيروبتدي نفس احساس الانجازاللي بتحسة الست اللي بتشتغل
خليني تاني أأكد على كلمة "بعض الحالات" مش كلها وده اللي خلاني اكتب الاسئلة اللي انا كتبتها في البوست لأنها بتنور الطريق للست اللي محتارة ... لكن اي واحدة راضية ومبسوطة في شغلها فالبوست ده غير موجه لها اطلاقاً :)
عموماً تابعيني وانتي هاتعرفي انا ليه مبسوطة كدة اني قعدت في البيت :)
هاهههههههههههههههههههههه عسل واللهى يا داليا ربنا يكرمك يارب وينور بصيرتك وبصيرة الناس كلها ان شء الله ومستنين الجديد يا جميل
Post a Comment